Nýsköpunarsjóður fjárfesti fyrir milljarð í fyrra

Rekstur Nýsköpunarsjóður atvinnulífsins gekk vel á árinu 2009 og skilaði sjóðurinn 13 milljóna króna hagnaði og handbært fé frá rekstri nam 252 milljónum króna.

Í tilkynningu segir að á árinu fjárfesti Nýsköpunarsjóður atvinnulífsins fyrir samtals 1.042 milljónir króna. Fjárfest var í 7 nýjum sprotafyrirtækjum fyrir samtals 370 milljónir króna, í 10 fyrirtækjum sem sjóðurinn átti í áður fyrir samtals 349 milljónir króna og í 3 samlagssjóðum fyrir samtals 323 milljónir króna.

Samkvæmt efnahagsreikningi námu heildareignir sjóðsins í lok árs 4.302 milljónum króna. Bókfært eigið fé sjóðsins var á sama tíma 4.168 milljónir króna og er eiginfjárhlutfall sjóðsins því 97%.

Í árslok átti Nýsköpunarsjóður hlut í 34 sprotafyrirtækjum og gekk rekstur margra þeirra vel á síðasta ári. Eignarhlutar sjóðsins í þessum félögum nema að kaupverði 2,6 milljörðum króna. Þá á sjóðurinn hlut í þremur samlagssjóðum og nemur kaupverð eignarhluta í þeim sjóðum 485 milljónum króna.

Þau nýju verkefni sem Nýsköpunarsjóður atvinnulífsins fjárfesti í á síðasta ári eru eftirfarandi:

gogoyoko ehf sem er tónlistar- og samskiptavefur þar sem tónlistafólk og unnendur tónlistar stunda milliliðalaus viðskipti og samskipti. gogoyoko veitir í raun aðgang að alheimsmarkaði milliliðalaust. Starfsmönnum hefur fjölgað verulega á árinu og eru nú 28.

Gogogic ehf sem sérhæfir sig í frumlegri leikjahönnun, gerð smærri tölvuleikja og framleiðslu margmiðlunarefnis fyrir vefinn. Fyrirtækið hefur m.a. gefið út tölvuleikinn Symbol6 og fyrir iPhone og iPod Touch. Hjá fyrirtækinu starfa nú 18 manns.

Auris ehf er fyrirtæki sem vinnur að þróun á nýju lyfi til útvortis notkunar gegn bráðri miðeyrnabólgu hjá börnum. Lyfinu er ætlað að koma í stað hefðbundinnar sýklameðferðar sem getur valdið lyfjaónæmi. Félagið hefur gert samning um klínískar rannsóknir þar sem lyfið verður prófað og á þeim að ljúka í byrjun næsta árs.

Gagnavarslan ehf sem veitir fyrirækjum og stofnunum margþætta þjónustu og ráðgjöf við skipulagningu og varðveislu gagna af öllum gerðum. Gagnavarslan hefur þróað og byggt upp sérfræðiþekkingu á þessu sviði. Í geymslum félagsins á Ásbrú í Reykjanesbæ er hægt að geyma ekki aðeins pappír- og rafræn gögn heldur einnig listaverk og menningaminjar við rétt hita- og rakastig. Hjá félaginu starfa 30 manns.

Mentis Cura ehf hefur þróað aðferð sem greinir heilasjúkdóma, m.a. Alzheimer, út frá heilaritum sem aðferð félagsins greinir og túlkar. Með greiningu er vonast til að sjúkdómar verði greindir fyrr og af meira öryggi en áður sem aftur gæti aukið möguleikana á læknismeðferð. Markaðssetning á vörum félagsins er að hefjast í samstarfi við stórt alþjóðlegt fyrirtæki á heilbrigðissviði. Hjá Mentis Cura starfa nú 9 manns.

Grapewire ehf er leiðandi í framsetningu og þróun netviðskiptalausna fyrir tónlistarmenn og aðra í skyldri starfsemi. Félagið hefur að leiðarljósi að einfalda framsetningu í dreifingu og sölu í hinum stafræna heimi. Þá vinnur Grapewire að byltingarkenndri nálgun í streymi á tónlist. Sú þjónusta fer í loftið í apríl 2010. Starfsvettvangur félagsins er bæði hér heima og erlendis.

Kerecis ehf sem er þróunar- og framleiðslufyrirtæki á sviði lækningavara og byggir tækni sína á próteinum unnum úr fiski. Fyrirtækið vinnur í náinni samvinnu við heilbrigðisstéttir og vinnur að þróun á tækni til meðhöndlunar á sköðuðum vef. Fyrirtækið nýtur góðs af samstarfi við Tækniþróunarsjóð, Matís og Atvinnuþróunarfélag Vestfjarða.

Nýsköpunarsjóður atvinnulífsins er sjóður sem fjárfestir í áhugaverðum nýsköpunarverkefnum með hlutafjárkaupum í sprota- og nýsköpunarfyrirtækjum. Starfsmenn sjóðsins eru 6 og fjölgaði þeim um 1 á árinu. Framkvæmdastjóraskipti voru hjá sjóðnum þann 20. mars en þá tók Helga Valfells við stjórn sjóðsins af Finnboga Jónssyni sem hefur hafið störf sem framkvæmdastjóri Framtakssjóðs Íslands.