Krónuveltan á millibankamarkaði að verða eðlileg

Veltan á millibankamarkaði með krónur nam 31,5 millljörðum kr. í október. Þetta kemur fram í hagtölum Seðlabankans og samkvæmt þeim virðist veltan á þessum markaði að komast í eðlilegt horf, það er að verða svipuð og hún var frá 1999 og fram á mitt árið 2004.

Millibankamarkaður með krónur er þegar bankar og sparisjóðir lána hvor öðrum skammtímalán. Á árunum rétt fyrir hrunið var veltan á þessum markaði nær alltaf yfir 100 milljörðum kr. á mánuði og dæmi um að hún færi yfir 200 milljarða kr. í stöku mánuðum.

Frá hruninu hefur veltan sveiflast mikið og nefna má að á síðasta ári var engin velta í fimm mánuðum af tólf.

Sveiflurnar héldu áfram í upphafi þessa ár og nefna má að veltan á millibankamarkaðinum nam 2 milljörðum kr. í janúar en 65 milljörðum kr. í febrúar.

Á síðari hluta ársins hefur þetta ástand jafnast út og hefur veltan að jafnaði legið á bilinu 20 til 40 milljarðar kr. á mánuði, að vísu í lægri kantinum mánuðina tvo á undan október.