Glitnir lánaði Byr og Byr lánaði FL Group sömu upphæð

Glitnir lánaði Byr Sparisjóði þrjá milljarða króna á sama tíma og sjóðurinn lánaði FL Group sömu upphæð. Grunur leikur á að Glitnir hafi með þessum hætti komist hjá því að vera beinn lánveitandi stærsta hluthafa síns, FL Group.

Nokkrir af stærstu hluthöfum FL Group, Þorsteinn M. Jónsson, Magnús Ármann og Pálmi Haraldsson, voru á meðal stærstu hluthafa Byrs. FL Group var stærsti hluthafinn í Glitni. Fram hefur komið að viðskipti Glitnis með hlutabréf í FL Group hafi verið nokkuð umfangsmikil. Þá kom fram í lánabók Glitnis sem birtist í Morgunblaðinu haustið 2008 að FL Group hafi verið stærsti einstaki skuldari fyrirtækjahluta lánabókarinnar. Lán til félagsins námu 26,6 milljörðum króna.

Samkvæmt heimildum fréttastofu lánaði Byr sparisjóður rúma 3 milljarða króna til FL Group á vormánuðum 2008 þegar félagið var komið í afar þrönga stöðu. Skilyrði fyrir lánveitingunni hafi verið að Glitnir lánaði sjóðnum sömu upphæð. Það lán var veitt í lok mars sama ár.

Á þessum tíma var Jón Sigurðsson forstjóri FL Group en hann sat jafnframt í stjórn Glitnis.

Í reglum um stórar áhættuskuldbindingar hjá fjármálafyrirtækjum kemur fram að skuldbindingar einstakra viðskiptamanna eða fjárhagslegra tengdra aðila megi ekki fara yfir 25% af eigin fé fjármálafyrirtækisins.

Samkvæmt heimildum mun vera farið yfir lánveitinguna í skýrslunni sem forsvarsmenn Byrs sendu inn til sérstaks saksóknara í síðustu viku. Spurningarmerki er sett við hvort lánveitingin hafi farið þessa krókaleið til að koma í veg fyrir að FL Group færi yfir 25% markið. Guðmundur Geir Gunnarsson, stjórnarformaður Byrs, vildi ekki tjá sig um málið við fréttastofu þar sem það er á rannsóknarstigi.