Eignir sjóða hækkuðu um 11 milljarða í ágúst

Eignir verðbréfa- og fjárfestingarsjóða námu 284,8 milljörðum kr. í lok ágúst og hækkuðu um 11 milljarða kr. milli mánaða eða um 4%.

Þetta kemur fram í hagtölum Seðlabankans. Þar segir að innlend verðbréf hækkuðu um 11,5 milljarða kr. í mánuðinum, þar af nam hækkun íbúðabréfa 5,5 milljörðum kr. og annarra ríkisbréfa 4,8 milljörðum kr. Eignir verðbréfa og fjárfestingarsjóða eru 94% innlend verðbréf sem að stærstum hluta eru ríkistryggð verðbréf og innlán.

Í lok ágúst var opið fyrir viðskipti með hlutdeildarskírteini í 53 sjóðum. Auk þess voru 17 sjóðir í slitaferli taldir með í birtum ágúst gögnum, þar sem verið er að gera upp eignir sjóðanna áður en þeim verður lokað.