Eignarýrnun/verðbólga eyðir allri millistéttinni á Íslandi

Innlend verðbólga og eignarýrnun mun að öllum líkindum eyða alveg allri millistétt Íslands. Landinu er haldið á floti af Alþjóðagjaldeyrissjóðnum, tæknilegum gjaldþrotum og gjaldeyrishöftum.

Þetta kemur fram í grein sem hagfræðingurinn Dian L. Chu skrifar um hvort Bandaríkin muni fylgja í kjölfar Íslands hvað fasteignakreppu varðar. Dian er dálkahöfundur um efnahagsmál hjá Reuters, USA Today, BusinessWeek og fleiri miðlum. Greinin hefur vakið athygli og er birt á vefsíðum á borð við Market Oracle og benzinga.

Dian L. Chu byggir grein sína á tölulegum upplýsingum á Bloomberg fréttaveitunni um íslensk efnahagsmál frá því fyrir hrunið 2008 og fram til dagsins í dag.

Dian telur m.a upp það sem hún kallar ógnvekjandi hagtölur. Verðbólgan jókst um 41% frá janúar 2007 og fram til september í ár. Kaupmáttur minnkaði um rúm 20% á síðasta ári. Raunlaun hafa lækkað um rúm 10% frá ársbyrjun til ágúst í ár. Um 63% af húsnæðislánum þjóðarinnar eru vandamál. Um 40% af húseigendum á Íslandi eru tæknilega gjaldþrota.

Grein Dian er skrifuð í framhaldi af því sem kallað hefur verið gjaldmiðlastríðið sem nú geysar á alþjóðamarkaði. Margir hagfræðingar í Bandaríkjunum telja að hagkerfið þar í landi muni verða samkeppnishæfara og skapa fleiri störf ef dollaranum verði leyft að lækka gífurlega eða um 50%.

„Jæja, lítum á Ísland til að kanna þessa kenningu," segir Dian. „Gjaldmiðill Íslands hefur hrunið um tæp 60% frá því í júlí 2006. Laun hafa einnig lækkað og fyrir utan lán Alþjóðagjaldeyrissjóðins er Íslandi haldið á floti með „tæknilegum gjaldþrotum" og gjaldeyrishöftum," segir Dian.

„Þrátt fyrir að gengisfall krónunnar hafi hjálpað útflutningsgreinum landsins (á meðan lánadrottnar voru neyddir til að taka á sig afskriftir) mun innlend verðbólga og eignarýrnun að öllum líkindum eyða alveg allri millistétt landsins."