Nýjar neysluvísbendingar sýna vöxt í landsframleiðslunni

Greining Arion banka segir að nýjustu neysluvísbendingar bendi núi til jákvæðs viðsnúnings á vexti landsframleiðslunnar. Þar á greiningin við nýjar tölur um kortaveltu landsmanna en kortaveltan gefur ágætis vísbendingu um stefnu einkaneyslunnar.

„Að okkar mati er hugsanlegt að seinni árshelmingur ársins muni sýna vöxt í einkaneyslu samanborið við 1% samdrátt á þeim fyrri. Fyrir árið í heild er því ekki ólíklegt að einkaneysla muni sýna lítilsháttar vöxt milli ára," segir í Markaðspunktum greiningarinnar.

Ennfremur segir að eftir jákvæðar landsframleiðslutölur í upphafi árs sýndi annar ársfjórðungur 2010 merki um áframhaldandi neyslusamdrátt. Þannig skrapp landsframleiðslan saman um rúmlega 8% milli ára sem m.a. má rekja til samdráttar í einkaneyslu, en hún vegur um 50% í landsframleiðslunni í dag. Í raun komu tölurnar ekki á óvart enda var fyrirséð að þegar skammtímaúrræði stjórnvalda yrðu á enda og fáir þættir til að veita neyslusamdrættinum viðspyrnu kæmi bakslag í neysluna.

Debet- og kreditkortavelta landsmanna í ágúst jókst um 4,5% að raunvirði milli ára sem er einn mesti vöxtur sem mælst hefur frá hruni. Hugsanlegt er að hér séu áhrif vegna gengisdómsins að spila inn í en frysting á erlendum bílalánum, meðan beðið er eftir að niðurstöðu Hæstaréttar, eykur greiðslugeta heimila um hver mánaðarmót.

„Þrátt fyrir að nýjustu vísbendingar um einkaneyslu séu jákvæðar þá gerum við ráð fyrir fremur veikum efnahagsbata á næstu árum og að neyslustigið verði áfram í lágmarki, a.m.k. horft eitt ár fram í tímann," segir í Markaðspunktunum.

„Enn ríkir talsverð óvissa um ýmsa þætti er snýr að heimilum, til að mynda er ekki vitað hver skuldastaða heimila er. Þá er óljóst hvaða skattastefnu stjórnvöld muni framfylgja næstu árin.

Ólíklegt er að kaupmáttur nái sér almennilega á strik á næstunni enda sennilegt að launahækkunum verði stillt í hóf á meðan atvinnuleysi er hátt. Þrátt fyrir ýmis batamerki á vinnumarkaði er atvinnuleysi enn hátt og verður það líklega áfram næstu misserin."