Fjármálafyrirtæki fá undanþágu frá samkeppnislögum

Fjármálafyrirtæki fá að hafa samstarf um möguleg málaferli vegna gengistryggðra lána samkvæmt ákvörðun Samkeppniseftirlitsins sem gerð var opinber í gær. Eftirlitið setur samstarfinu þó ákveðin skilyrði.

„Ég tel jákvætt að þessi heimild sé komin, en hvort hún verður nýtt veltur á því sem kemur fram í boðaðri lagasetningu viðskiptaráðherra,“ segir Guðjón Rúnarsson, framkvæmdastjóri Samtaka fjármálafyrirtækja.

Samtökin sóttu um undanþágu frá samkeppnislögum vegna málsins í lok júlí. Í rökstuðningi samtakanna segir að í samstarfinu muni felast að fjármálafyrirtækin fari sameiginlega yfir lánasamninga og flokki þá þannig að fyrir liggi hvaða atriði verði nauðsynlegt að láta reyna á fyrir dómstólum.

Guðjón segir að hugmyndin sé sú að aðeins eitt lánafyrirtæki höfði mál til að fá niðurstöðu dómstóla á tilteknu ágreiningsefni. Hin fyrirtækin komi að ábendingum varðandi málið og kröfugerðina.

Heimild Samkeppniseftirlitsins mun væntanlega draga úr álagi á dómstóla, og flýta því að niðurstaða fáist í álitamálum, sem ætti að vera bæði lántakendum og lánveitendum til hagsbóta, segir Guðjón.

Samtök fjármálafyrirtækja sóttu um undanþáguna eftir að Hæstiréttur komst að þeirri niðurstöðu að gengistryggð lán væru ólögmæt, en áður en dómurinn ákvað hvaða vaxtakjör skyldu gilda. Í kjölfar dómsins tilkynnti viðskiptaráðherra, að til stæði að setja lög sem jafna eiga stöðu þeirra sem tekið hafa gengistryggð lán.

Guðjón segir að það velti á útfærslu fyrirhugaðrar lagasetningar hvort fjármálafyrirtækin muni nýta heimild Samkeppniseftirlitsins til samstarfs. Verði leyst út helstu ágreiningsmálum í lögunum sé óvíst að heimildin verði nýtt nema takmarkað. Þar skipti líka máli hvort lögin fjalli um lán til fyrirtækja jafnt sem einstaklinga.

brjann@frettabladid.is