Afgangur af vöruskiptum eykst um 26 milljarða

Afgangur á vöruskiptum fyrstu níu mánuði ársins er 88,6 milljarðar króna en á sama tímabili í fyrra var vöruskiptajöfnuður 63 milljarðar. Afgangurinn er því 25,6 milljörðum krónum meiri í ár en á sama tíma árið áður.

Vöruskiptajöfnuður var jákvæður um 10,6 milljarða króna í september. Fluttar voru út vörur fyrir 49,7 milljarða króna en fluttar voru inn vörur fyrir tæpa 39,1 milljarð. Í september í fyrra voru vöruskiptin hagstæð um tæpa 9,5 milljarða króna.

Sjávarafurðir voru um 39% alls útflutnings í ár fyrstu níu mánuði ársins og var verðmæti þeirra 7,3% meira en á sama tíma árið áður. Útfluttar iðnaðarvörur voru um 56% alls útflutnings og var verðmæti þeirra 36% meira en á sama tíma árið áður. Mest aukning varð í verðmæti útflutnings iðnaðarvara, aðallega áls. Einnig varð aukning í útflutningi sjávarafurða en samdráttur varð í útflutningi á skipum og flugvélum.

Fyrstu níu mánuði ársins var verðmæti vöruinnflutnings 26 milljörðum eða 8,5% meira en á sama tíma árið áður. Aukning varð í innflutningi á hrá- og rekstrarvöru, fjárfestingarvöru og eldsneyti en á móti kom samdráttur í innflutningi á flutningatækjum.