Íbúðaverð í borginni stóð í stað í ágúst

Íbúðaverð á höfuðborgarsvæðinu stóð í stað í ágúst frá fyrri mánuði samkvæmt vísitölu íbúðaverðs sem tekin er saman af Þjóðskrá Íslands og birt var síðdegis í gær. Vísitalan stendur nú í 302,8 stigum.

Greining Íslandsbanka fjallar um málið í Morgunkorni sínu. Þar segir að frá áramótum talið hefur íbúðaverð á höfuðborgarsvæðinu hækkað um 0,2 á þennan mælikvarða í heildina litið. Verð fjölbýla hefur hinsvegar staðið í stað frá áramótum talið og sérbýli hafa hækkað í verði um 1,4%.

Mikið flökt hefur verið í verðþróun íbúðahúsnæðis á höfuðborgarsvæðinu undanfarna mánuði en í heildina litið hefur verið að hægja á verðlækkunum. Undanfarna 12 mánuði hefur íbúðaverð lækkað um 3,6% að nafnverði en á sama tíma fyrir ári síðan nam 12 mánaða lækkun íbúðarhúsnæðis 10,3%.

Undanfarna 12 mánuði hefur raunverð íbúðarhúsnæðis á höfuðborgarsvæðinu lækkað um 9% en fyrir ári nam lækkunin á þennan mælikvarða 12%. Af þessu má sjá að það er að draga úr lækkunarhraðanum á þessum markaði sem gæti verið vísbending um að botninn í bæði nafnverði og raunverði íbúðarhúsnæðis sé skammt undan.

Vísbendingar um veltu á íbúðamarkaði benda í sömu átt, en svo virðist sem skriður sé að komast á þennan markað eftir langvarandi dvala síðustu missera. Sumarið er yfirleitt rólegur tími á fasteignamarkaði, en viðskipti hafa þó verið öllu líflegri nú í sumar á íbúðamarkaði en á sama tíma fyrir ári.