Fyrirtæki fá aðgang að Microsoft Office 2010

Í tilkynningu segir að þar með sé komin út ný kynslóð algengustu skrifstofuforrita sem notuð eru í heiminum; forrita á borð við ritvinnsluforritið Word, töflureikninn Excel, glæruforritið PowerPoint og samskiptaforritið Outlook, svo nokkur séu nefnd. Með þessari nýjustu útgáfu heldur Microsoft áfram þróun nýrra notendaskila Office-forritanna, en fyrirtækið gerði umfangsmiklar breytingar á þeim með síðustu útgáfu, Office 2007.

Microsoft hefur lagt mikla áherslu á að þróa hugbúnaðinn í samvinnu við viðskiptavini og notendur. Til marks um það má nefna að þrefalt fleiri notendur tóku þátt í Beta-prófunum Office 2010 og SharePoint 2010 heldur en sambærilegum prófunum á Office 2007. Það gerir það jafnframt að verkum að nú þegar nota 8,6 milljónir manna um heim allan Office 2010.

Fyrst um sinn er útgáfan einungis í boði fyrir þau fyrirtæki sem hafa gert leyfissamning við Microsoft, en Office 2010 verður gefið út á neytendamarkaði í næsta mánuði. Um leið er gert ráð fyrir að Office Web Apps, sem er vefútgáfa af öllum helstu Office-forritunum sem nota má án endurgjalds, verði í boði fyrir almenning.

„Þetta er stór áfangi fyrir okkur, enda eru Office og SharePoint í hópi helstu flaggskipa Microsoft. Um þessar mundir leita viðskiptavinir okkar allra leiða til að hagræða í sínum rekstri og auka hagkvæmni. Því er sérstaklega ánægjulegt að segja frá því að ný rannsókn Forrester Consulting bendir til að innleiðing 2010 útgáfanna af Office, SharePoint og Exchange auk Office Communications Server 2007 R2 skili 301% arði af fjárfestingu (ROI) og borgi sig upp á rúmum 7 mánuðum. Hér eru því komnar lausnir sem virkilega skila árangri fyrir viðskiptavini okkar," segir Halldór Jörgensson, framkvæmdastjóri Microsoft Íslandi í tilkynningunni.