Staða ríkissjóðs versnar, tekjur lækka og gjöld hækka

Greint er frá þessu á vefsíðu stjórnarráðsins. Þar segir að innheimtar tekjur ríkissjóðs í mars námu 29,7 milljarða kr. samkvæmt þessu bráðabirgðauppgjöri, og á fyrstu þremur mánuðum ársins samtals 111,0 milljarðar kr. Tekjuþróunin er heldur lakari en að var stefnt, sé útkoman borin saman við áætlun um hve stór hluti fjárlagaáætlunarinnar myndi innheimtast á þessu tímabili.

Tekjur tímabilsins janúar-mars voru áætlaðar 115,0 milljarðar kr. og frávikið því neikvætt um 4,0 milljarða kr. eða sem nemur 3,5% af áætlun. Þar af er frávik skatttekna neikvætt um 1,7 milljarða kr. eða sem nemur 1,6%.

Skatttekjur og tryggingagjöld námu 26,7 milljarða kr. í marsmánuði og 101,8 milljarða kr. samtals í janúar-mars, sem er 4,9 milljörðum kr. minna en á sama tíma 2009.

Staðgreiðsla á tekjuskatti og útsvari nam 31,1 milljarði kr. samtals í febrúar og mars og er það einum milljarði króna meira en á sama tíma í fyrra þegar innheimtan var 30,1 milljarði kr.

Greidd gjöld námu 131 milljörðum kr. og jukust um 7,7 milljarða kr. frá fyrra ári, eða 6,3%. Milli ára jukust vaxtagjöld ríkissjóðs um 6,8 milljarða kr. Útgjöld til menntamála jukust um 1,3 milljarða kr. og þar af útgjöld til Lánasjóðs íslenskra námsmanna um 1,8 milljarða kr. milli ára. Óregluleg útgjöld jukust um 631 milljón króna milli ára sem útgjöld vegna ríkisábyrgða skýra að öllu leyti.

Útgjöld til löggæslu, réttargæslu og öryggismála jukust um 669 milljónir króna milli ára þar sem fjárfesting Landhelgissjóðs í varðskipi skýrir hækkunina að langstærstu leyti. Útgjöld til efnahags- og atvinnumála drógust saman um 2,5 milljarða kr. milli ára þar sem framkvæmdir Vegagerðarinnar skýra 1,1 milljarð króna og Fjarskiptasjóður 535 milljónir króna. Breytingar í öðrum málaflokkum voru svo minni en þær sem hér hafa verið taldar.