Rannsóknarteymi skilar skýrslu um Landsbankann

„Þarna er um sérfræðinga á sviði bókhaldsrannsókna að ræða alveg sambærilega við Kroll hjá Glitni. Þeir munu skila áfangaskýrslu um rannsókn sína til næsta kröfuhafafundar í bankanum sem haldinn verður þann 27. maí," segir Páll.

Aðspurður um hvort upplýsingarnar verði gerðar opinberar segir Páll að blaðamenn fengju færi á að spyrja slitastjórnarmenn eftir fundinn um þetta mál eins og önnur eins og verið hefur eftir fyrri fundi kröfuhafanna. „Blaðamenn hafa haft greiðan aðgang að bæði skila- og slitastjórn bankans eftir kröfuhafafundina og svo verður áfram," segir Páll.

Páll er ósáttur við umræðugrein sem birtist á visir.is í gærdag og skrifuð var af Friðrik Indriðasyni einum af blaðamönnum vefsíðunnar þar sem skilanefnd Landsbankans var sökuð um að draga lappirnar í að senda frá sér mál miðað við það sem skilanefnir Kaupþings og Glitnis hafa gert. Hann segir það ekki rétt sem þar stóð að skilanefnd Landsbankans hefði ekki sent frá sér mál.

„Við höfum sent frá okkur nokkurn fjölda mála til Fjármálaeftirlitsins frá því að skilanefndin tók við rekstri á þrotabúi bankans," segir Páll. „Hvað fjármálaeftirlitið hefur svo gert við þau mál vitum við ekki."