Hafnarfjörður á Jólaþorp

Einkaleyfastofa hefur nú staðfest að vörumerkið Jólaþorp er eign Hafnarfjarðarbæjar. Bærinn kærði fyrri úrskurð um að um almennt heiti væri að ræða. Almenna heitið er jólamarkaður en heitið Jólaþorp hefur 7 ára markaðsfestu og á því byggist staðfesting Einkaleyfastofu nú.

Í fréttatilkynningu frá Hafnarfjarðarbæ kemur fram að undirbúningur sé nú í fullum gangi við Jólaþorpið í Hafnarfirði og uppselt í öll söluhúsin. Þar verður íslenskt handverk í aðalhlutverki, allt frá handgerðum höttum yfir í útskorna trékistla. Einnig mun jólamatur vera í öndvegi, þar sem hægt verður að gæða sér á heitu súkkulaði, pönnukökum, sörum, konfekti og ristuðum möndlum.