Nær öll bankahólf Íslandsbanka í notkun

Næstum öll bankahólf Íslandsbanka eru í notkun samkvæmt upplýsingum frá bankanum. Viðskiptavinur bankans hafði samband við Vísi og greindi frá því að hann hefði sótt um bankahólf hjá bankanum.

Hann fékk þau svör að ekkert slíkt hólf væri á lausu á stórhöfuðborgarsvæðinu.

Þau svör fengust í kjölfarið hjá bankanum að eftirspurn eftir bankahólfum hefði stóraukist haustið 2008, eða á sama tímabili og bankakerfið hrundi. Þá voru nýtt öll bankahólf bankans og eru flest þeirra enn í notkun.

Þá ber að taka fram að starfsmenn bankans hafa ekki orðið varir við aukinni eftirspurn eftir bankahólfum síðastliðna mánuði.

Ekki fengust svör um það hversu mörg bankahólf eru hjá Íslandsbanka. Slíkar upplýsingar eru ekki gefnar upp.