Kaupin á TM voru glórulaus fyrir Glitni

Í stefnu slitastjórnar Glitnis fyrir dómstóli í New York er fjallað um leikfléttuna í kringum kaupin á Tryggingamiðstöðinni (TM) en þau kaup eru sögð hafa verið glórulaus fyrir Glitni. Á endanum tapaði bankinn tæplega 26 milljörðum kr. á þessum kaupum.

Fram kemur að hinir ákærðu í málinu, Jón Ásgeir Jóhannesson og fleiri, hafi sett á svið skeljaleik (shell game) haustið 2007 þar sem útblásin lánaáhætta Glitnis var færð frá einum tengdum aðila yfir til annars án þess að sannleikurinn væri opinberaður fyrir almenningi.

Leikfléttan við kaupin á TM er rakin í fimm þáttum. Fyrst lánaði Glitnir félaginu Kjarrhólma (dótturfélags FL Group) til kaupa á 38% hlut í TM. Lánið var með veði í hinum keypta hlut.

Í öðru lagi keypti FL Group síðan hlut minni hluthafa í Kjarrhólma með fjármögnun frá Glitni. Þetta var gert með dæmigerðri hringekju þ.e. FL Group lánaði minnihlutanum til að „kaupa" hluti í FL Group en notaði síðan afraksturinn af þeirri sölu til að fjármagna kaupin á minnihlutanum í Kjarrhólma. Við þessar tilfæringar jókst lánaáhætta Glitnis um tæpa 10 milljarða kr.

Í þriðja lagi keypti Glitnir sjálfur 39,8% hlut í TM á markaðinum fyrir 20 milljarða kr. Seljendur fengu að hluta til borgað með hlutum í Glitni. Bent er á að þessi kaup hafi verið gerð án ákvörðunar frá stjórn bankans, áhættustýringar eða fjárfestinganefndar. Áhættustýringunni var greint frá kaupum þessum viku eftir að þau voru yfirstaðin.

Í fjórða lagi seldi Glitnir síðan hlut sinn í TM til FL Group í skiptum fyrir hluti í FL Group.

Að lokum þegar þeir sem ákærðir eru í stefnunni vissu að þeir þurftu að draga úr lánaáhættu Glitnis gagnvart stærsta hluthafa bankans, það er FL Group, bjuggu þeir til fléttu með því að færa hluti í FL Group til tengdra aðila í eigu Jóns Ásgeirs Jóhannessonar. „Þetta var hreinn skáldskapur," segir í stefnunni. Glitnir lánaði þremur af fjórum aðilum tengdum Jóni Ásgeir, Oddaflugi, 101 Capital og Sólmon, til að kaupa hlutina í FL Group með veði í hlutunum sjalfum.

"Þessi viðskipti voru hreint svindl", segir í stefnunni