Reiknar með 0,75 prósentustiga vaxtalækkun

Greining MP Banka reiknar með því að á miðvikudaginn kemur muni peningastefnunefnd Seðlabankans ákveða að lækka vexti um 0,75 prósentustig. Þetta yrði í þrettánda sinn sem vextir lækka frá því að nefndin tók við vaxtaákvörðunarhlutverkinu fyrir hálfu öðru ári.

Fjallað er um málið í Markaðsvísi greiningarinnar. Þar segir að í nýjustu fundargerð peningastefnunefndarinnar kemur fram að við vaxtaákvörðun í september hafi verið rætt um að þrengja vaxtaganginn. „Við teljum að það verði gert nú," segir í Markaðsvísinum.

Enn er unnið samkvæmt þeirri áætlun að hefja afnám gjaldeyrishafta eins fljótt og auðið er. Þess vegna er æskilegt að raunvaxtamunur við viðskiptalönd sé nægjanlegur til þess að ekki skapist fjármagnsflótti þegar slakað er á höftunum. Á móti því kemur að efnahagsástandið er slæmt og töluverðar líkur á að það versni enn að öðru óbreyttu.

Vextir þurfa því að enn að lækka til þess að stuðla að fjárfestingu og raunvaxtastigið er enn of hátt. Framleiðsluslaki í hagkerfinu er mjög mikill og framleiðsluþættir ónýttir. Verðbólgan hjaðnar enn, meðal annars vegna þess að gjaldeyrishöftin styðja við krónuna.

„Verðbólguhættan er fyrst og fremst á kostnaðarhliðinni. Ef samið verður um miklar launahækkanir er hætta á að þær rati út í verðlag. Lægri vextir og hærra gengi kunna að halda aftur af launahækkunum og því sennilegt að innlent efnahagsástand vegi tiltölulega þungt við vaxtaákvörðun nú. Við reiknum því með því að stýrivextir, þ.e. vextir á lánum gegn veði, verði nú lækkaðir um 0,75%," segir í Markaðsvísinum.