Ríkisskattstjóri skoðar 60 mál vegna söluréttasamninga

Um sextíu mál eru í vinnslu hjá Ríkisskattstjóra varðandi skattálagningu á söluréttasamninga og fer þeim fjölgandi. Lægsta endurákvörðunin í málunum nemur tugum milljóna en hæsta hálfum milljarði króna. Ríkisskattstjóri vann í dag í annað sinn mál fyrir héraðsdómi vegna samninganna.

Íslenska ríkið var í dag sýknað af kröfu Bjarka H. Diego, fyrrverandi framkvæmdastjóra hjá Kaupþingi, en hann höfðaði mál á hendur Ríkisskattstjóra vegna skattálagninga á söluréttarsamningum af hlutabréfum í Kaupþingi. Bjarki hafði ásamt öðrum stjórnendum í Kaupþingi fengið endurákvörðun á skatti vegna söluréttasamninga. Í hans tilviki nam hún um eitthundrað og fimmtíu milljónum króna.

Bjarki fullyrti að samningar sem hann gerði um kaup á hlutabréfunum væru ólíkir kaupréttarsamningum. Auk þess taldi hann Ríkisskattstjóra vanhæfan til að úrskurða í málinu vegna þeirra dylgna og fyrirlitningar á bankamönnum sem birst hafa í greinaskrifum í Tíund, fréttablaði Ríkisskattstjóra. Þetta féllst dómarinn ekki á. Ummæli Ríkisskattstjóra hefðu verið almenn eðlis og samningarnir hafi falið í sér umtalsverðar hlunnindatekjur og í reynd hafi verið um að ræða útfærsla á kauprétti.

Lögmaður Bjarka sagði dóminn vonbrigði en honum yrði áfrýjað. Ríkisskattstjóri hefur áður unnið sambærilegt mál gegn Þórði Má Jóhannessyni, fyrrverandi forstjóra Straums fyrir Héraðsdómi og yfirskattanefnd. Þórður áfrýjaði málinu til Hæstaréttar og bíður nú niðurstöðu.

Samkvæmt heimildum fréttastofu eru um sextíu sambærileg mál í vinnslu hjá Ríkisskattstjóra. Í þessum málum nemur lægsta endurákvörðunin tugum milljóna króna en sú hæsta um hálfum milljarði króna. Heimildir herma að málum af þessu tagi fari ört fjölgandi.