Yfir 90% sætanýting hjá Iceland Express til New York

Iceland Express hefur ákveðið að fljúga til New York allan ársins hring. Fram til 1. nóvember verður flogið fjórum sinnum í viku mánudaga til fimmtudaga, en frá nóvemberbyrjun verður flogið þrisvar í viku mánudaga, miðvikudaga og föstudaga.

„Þessari nýjung hefur verið tekið opnum örmum, " segir Matthías Imsland forstjóri Iceland Express í tilkynningu um málið. „Sætanýting okkar er vel yfir 90 prósent og það er langt umfram það, sem við þorðum að vona. Nú þegar er uppselt í margar ferðir á næstu vikum."

Fjöldi erlendra farþega Iceland Express hefur dvalið á Íslandi á leið sinni til og frá New York undanfarnar vikur. Það er búhnykkur fyrir ferðamannaiðnaðinn. Ljóst er af bókunum, að fjölmargir farþegar hyggjast staldra við hérna næstu vikur á leið sinni yfir hafið.