Orri Hauksson ráðinn framkvæmdastjóri Samtaka iðnaðarins

Orri Hauksson hefur verið ráðinn framkvæmdastjóri Samtaka iðnaðarins og hefur þar störf í ágúst.

Hann tekur við starfinu af Jóni Steindóri Valdimarssyni, fyrrverandi framkvæmdastjóra, sem sagði starfi sínu lausu í byrjun mánaðar.

Í fréttatilkynningu frá samtökunum segir að Orri hafi gegnt ýmsum stjórnunarstöðum og hafi undanfarin ár sinnt fjárfestingum og setið í stjórnum nokkurra fyrirtækja fyrir hönd Novator, aðallega á sviði fjarskipta og hreinna orkugjafa í Bandaríkjunum og á Norðurlöndum. Hann var áður framkvæmdastjóri þróunarsviðs Símans.

Orri var aðstoðarmaður forsætisráðherra árin 1997 til 2000. Hann er 39 ára vélaverkfræðingur frá HÍ og MBA frá Harvard Business School.