Nærri 12% atvinnuleysi á Suðurnesjum

Atvinnuleysi í júní var 7,6% en að meðaltali voru 12.988 manns atvinnulausir í mánuðinum, samkvæmt tölum Vinnumálastofnunar. Atvinnuleysi minnkar um 6,4% frá maí, eða um 887 manns að meðaltali.

Körlum fækkar meira en konum milli mánaða, eða um 776 að meðaltali en konum fækkar um 111 að meðaltali. Atvinnuleysið er nú 7,7% meðal karla og 7,3% meðal kvenna.

Fækkun á atvinnuleysisskrá er hlutfallslega meiri á landsbyggðinni en á höfuðborgarsvæðinu. Atvinnuleysi er nú 8,5% á höfuðborgarsvæðinu en 5,9% á landsbyggðinni. Mest er atvinnuleysi á Suðurnesjum eða um 11,9%, en minnst á Norðurlandi vestra eða um 2,6%.

Vinnumálastofnun segir að yfirleitt batni atvinnuástandið frá júní til júlí m.a. vegna árstíðasveiflu. Í júlí 2009 minnkaði atvinnuleysi úr 8,1% í júní í 8% í júlí. Vinnumálastofnun áætlar að atvinnuleysið í júlí minnki og verði á bilinu 7,2%-7,6%.