Farið fram á gjaldþrotaskipti hjá BGE ehf.

Fjallað er um málið í Viðskiptablaðinu. Þar segir að stærstu hluthafar félagsins eru þeir Jón Ásgeir Jóhannesson, stjórnarformaður Baugs, Gunnar Sigurðsson, forstjóri Baugs, og fjármálastjórinn Stefán H. Hilmarsson, sem hver fór með 24% hlut. Sex aðrir starfsmenn Baugs voru á meðal eigenda.

Félagið tapaði 830 milljónum kr. árið 2008 en eignarhlutur félagsins í Baugi Group var verðlaus með öllu um það leyti. Ári áður hafði eignarhlutur félagsins í Baugi verið metinn á 1,9 milljarða króna. Eigið fé félagsins var neikvætt um 99 milljónir króna í lok árs 2008.

Í árslok 2008 var langstærsta eign félagsins skuldabréfaeign upp á 2,8 milljarða króna en félagið hafði veitt starfsmönnum Baugs Group hf. lán til fjármögnunar á kaupréttum í félaginu, sem voru þá fullnýttir. Hluthafalánin voru veitt á hagstæðum kjörum, Libor + 1,9% álagi og áttu að koma til greiðslu á árunum 2009-2012. Kaupþing fjármagnaði félagið og voru veðin í bréfunum sjálfum. Í fyrra átti BGE að greiða bankanum um 1.754 milljónir króna, að því er segir í Viðskiptablaðinu.