Sala skuldabréfa margfaldast milli mánaða

Heildarsala skuldabréfa í verðbréfaútboðum í nóvember 2010 nam rúmum 43,6 milljörðum kr. á söluverði samanborið við tæpa 12,5 milljarða kr. mánuðinn áður.

Þetta kemur fram í hagstölum Seðlabankans. Þar segir að útboð í formi verðtryggðra skuldabréfa námu 18,8 milljörðum kr. en þar af voru tæplega 6,7 milljarðar kr. verðtryggð ríkisbréf. Útboð í formi óverðtryggðra skuldabréfa námu 24,8 milljörðum kr. allt ríkisbréf.

Nóvember er söluhæsti mánuður ársins hvað skuldabréf varðar en ágúst var það áður með heildarsölu upp á rúmlega 30 milljarða kr.