Eignir gamla Landsbankans lágt metnar

Í lok júní var áætlað verðmæti allra eigna gamla Landsbankans 1.177 milljarðar króna. Þar af var virði dótturfélaga bankans, sem Iceland Foods fellur undir, metið á 83 milljarða króna. Þetta þykir afar varfærið mat, ekki síst með tilliti til tilboðs Malcolms Walker.

Skilanefndin kynnir nýtt verðmat í byrjun desember. Eftir því sem næst verður komist gæti eignastaðan batnað verulega, ekki síst þar sem við bætist krafa skilanefndar á hendur þrotabúi Landsbankans í Lúxemborg. Verðmiði fékkst á kröfuna í kjölfar samkomulags við evrópska seðlabankann í Lúxemborg í júlí.

Skilanefndin hefur fram til þessa gert ráð fyrir að geta greitt 89 prósent af forgangskröfum. Ekki er þó útilokað að bankinn geti greitt þær svo til að fullu.