iPad til leigu í vélum Iceland Express

Iceland Express býður nú farþegum sínum til leigu iPad á flestum flugleiðum félagsins. Í tilkynningu segir að félagið sé þannig fyrst evrópskra flugfélaga til að bjóða slíka þjónustu um borð.

„Farþegar Iceland Express geta með iPad-num lesið íslensk blöð og valin erlend, svo og ýmis tímarit. Þá er einnig mögulegt að horfa á kvikmyndir, sjónvarpsþætti, hlusta á útvarp og spila tölvuleiki.

„Meðal samstarfsaðila félagsins í þessum efnum eru Lifandi vísindi, Nude Magazine, Reykjavík Grapewine, Blueeyes, Vesturport, Dexoris, Gogogic, Skoppa og Skrýtla, Ruv og Stef," segir einnig.

Kristín Þorsteinsdóttir upplýsingafulltrúi Iceland Express, segir að 1500 krónur kosti að leigja græjuna og gildir þá einu hversu langt flug er um að ræða.