Skýrr komið í innsta hring hjá Microsoft

Microsoft hefur tekið íslenska upplýsingatæknifyrirtækið Skýrr inn í svokallaðan „Inner Circle"-hóp samstarfsaðila Microsoft. Í tilkynningu frá fyrirtækinu segir að þangað komist einungis þau fyrirtæki sem Microsoft telur hafa sýnt bestan árangur í að nýta Microsoft Dynamics-viðskiptalausnir til að þróa og efla starfsemi viðskiptavina sinna.

„Fyrirtæki sem komast í innsta hring hjá Microsoft halda nafnbótinni eitt ár í senn. Í ár komast einungis 72 af samstarfsaðilum Microsoft í innsta hring hjá Microsoft og í ljósi þess að samstarfsaðilar Microsoft skipta þúsundum á heimsvísu er árangur Skýrr afar eftirtektarverður."

„Við erum eðlilega mjög stolt af þessari útnefningu, því Microsoft er kröfuharður og metnaðarfullur samstarfsaðili," segir Gestur G. Gestsson, forstjóri Skýrr. „Skýrr hefur árum saman unnið markvisst að því að breikka og dýpka framboð sitt í þjónustu við Microsoft-lausnir. Sú þróun hefur verið knúin áfram af óskum okkar viðskiptavina. Við lítum á útnefninguna sem góða viðurkenningu og ákveðinn áfanga á langri vegferð,"

Tilkynnt var um árangur Skýrr á samstarfsaðilaráðstefnu í Washington og var formleg viðurkenning afhent fyrirtækinu nú í vikunni. Við útnefninguna lagði Microsoft áherslu á hversu góðum árangri Skýrr hafi náð við að þróa viðskiptalausnirnar Microsoft Dynamics NAV og AX, innleiða þær og nýta til að auka hagkvæmni í starfsemi viðskiptavina Skýrr á Íslandi. Auk Inner circle-nafnbótarinnar hefur Skýrr einnig fengið inngöngu í svokallaðan „President's Club" hjá Microsoft, sem einnig er viðurkenning fyrir samstarfsaðila Microsoft í viðskiptalausnum sem hafa náð góðum árangri í starfi sínu.