Ráðstöfunartekjur heimila lækkuðu um 5,4% milli ára

Ráðstöfunartekjur heimilageirans eru taldar hafa lækkað árið 2009 um 5,4% frá fyrra ári.

Þetta kemur fram á vefsíðu Hagstofunnar. Þar segir að ráðstöfunartekjur á mann drógust saman um 5,3% milli ára og kaupmáttur ráðstöfunartekna á mann um 15,5%.

Heildartekjur heimilageirans eru taldar hafa dregist saman um 3,2% frá árinu 2008 til 2009 og heildareigna- og tilfærsluútgjöld aukist um 0,4%.

Samhliða birtingu talna fyrir árið 2009 hafa eldri tölur verið að hluta til uppfærðar. Helsta breyting á tímabilinu er sú að tölur yfir húsaleigubætur hafa nú verið endurskoðaðar aftur til ársins 2004 með tilliti til ítarlegri upplýsinga um framlög Jöfnunarsjóðs sveitarfélaga.

Einnig hafa tölur er varða undirliðinn ‚leiga á landi' í eignartekjum og -gjöldum verið teknar til endurskoðunar fyrir tímabilið 1997-2007 með tilliti til annarra geira hagkerfisins, að því er segir á vefsíðunni.