Hefur engin áform um að opna verslun í London

„Engin plön eru á mínum borðum um að opna búð í London," segir Jón Ásgeir Jóhannesson í samtali við fréttastofu.

Viðskiptablaðið greindi frá því að Jón Ásgeir ætlaði að opna nýja verslunarkeðju í London. Búðirnar myndu heita Best Price. Verið væri að leita að heppilegum staðsetningum fyrir þessar búðir.

Hugmyndin væri að byggja verslanirnar upp á svipaðan hátt og Bónus var byggður upp á Íslandi frá árinu 1989. Jón Ásgeir hafnar því hins vegar alfarið að hann sé með slíkar áætlanir í farvatninu.