Skuldatryggingaálag ríkissjóðs niður í 401 punkt

Fjallað er um málið í Morgunkorni greiningar Íslandsbanka. Þar segir að þessi lækkun áhættuálagsins á íslenska ríkið er þó síður en svo einsdæmi enda hefur skuldatryggingaálag ríkja almennt farið lækkandi á síðustu vikum. Skuldatryggingaálag Grikklands stóð þannig í 292 punktum í morgun en það fór hæst í 428 punkta í febrúarbyrjun og hefur því lækkað um 136 punkta á þessum tíma.

Sömu sögu er að segja um skuldatryggingaálag ríkja sem einnig glíma við mikinn halla á opinberum fjármálum líkt og Grikkland. Skuldatryggingaálag Dubai, sem komst í fréttirnar í upphafi árs sökum lélegrar skuldastöðu, hefur lækkað verulega en um miðjan febrúar stóð álag furstadæmisins í 651 punktum en nú í morgun var álagið komið niður í 436 punkta.

Þrátt fyrir þessa miklu lækkun skuldatryggingaálagsins á íslenska ríkið síðustu vikurnar er álagið enn afar hátt. Einungis sex önnur ríki eru með hærra áhættuálag en það íslenska, það er Argentína, Venesúela, Pakistan, Úkraínu, Írak og Dubai.

Í raun er það fátt sem hefði átt að lækka áhættuálagið á íslenska ríkið umfram önnur ríki undanfarið. Eins og kunnugt er hefur ekkert þokast í átt til lausnar Icesave deilunnar og hefur það tafið fyrir framvindu annarra mikilvægra mála eins og lánafyrirgreiðslna frá Alþjóðagjaldeyrissjóðnum og Norðurlöndum.