Skipti greiða lánadrottnum 19 milljarða

Skipti hf. hafa í öllum meginatriðum lokið samningum við lánardrottna félagsins og er vinna við skjalagerð á lokastigi. Í samkomulaginu felst meðal annars að Skipti greiða niður alls um 19 milljarða króna af lánum félagsins. Með því að greiða um 19 milljarða króna inn á lán félagsins mun sambankalán Skipta lækka úr um 41,7 milljörðum króna í um 22,7 milljarða króna. Engar skuldir eru afskrifaðar og öll lán Skipta eru eftir sem áður í skilum.

Í fréttatilkynningu frá Skiptum segir að viðræður hafi staðið um nokkurt skeið um að Skipti greiði lán félagsins hraðar niður en upphaflegir lánasamningar gerðu ráð fyrir. Lausafjárstaða Skipta sé mjög sterk, félagið hafi í lok júní átt um 16,6 milljarða króna í handbæru fé og í júlí var gengið frá sölu Skipta á norræna upplýsingatæknifyrirtækinu Sirius IT með umtalsverðum söluhagnaði.

Í kjölfar efnahagshrunsins á Íslandi hækkuðu skuldir Skipta umtalsvert líkt og flestra annarra íslenskra fyrirtækja. Þeir fjármunir sem nú eru greiddir hafa fengist við sölu erlendra eigna félagsins annars vegar og hins vegar með því að beita ítrasta aðhaldi í rekstri.