Hreinar erlendar skuldir eru 24% af landsframleiðslu

Ef frá eru taldir bankar  í slitameðferð námu erlendar eignir íslenska  þjóðarbúsins 2.580 milljörðum kr.  og skuldir 2.947 milljörðum kr. Því var hrein staða þjóðarbúsins hvað erlendar eignir varðar neikvæð um 368 milljarða kr. eða sem nemur  24% af landsframleiðslu.

Á vef Seðlabanka Íslands hafa nú verið birt bráðabirgðayfirlit um greiðslujöfnuð við útlönd á þriðja ársfjórðungi 2010 og um stöðu þjóðarbúsins í lok fjórðungsins.

Á þriðja ársfjórðungi mældist 23,8 milljarða kr. afgangur á viðskiptajöfnuði samanborið við rúmlega 44 milljarða kr. halla á öðrum fjórðungi. Afgangur af vöruskiptum við útlönd var 21,8 milljarðar kr. og 35,3 milljarða kr. afgangur var á þjónustuviðskiptum. Jöfnuður þáttatekna var hinsvegar neikvæður um 33,3 milljarða kr.

Halla á þáttatekjum á þriðja ársfjórðungi má eins og áður rekja til innlánsstofnana í slitameðferð. Reiknuð gjöld vegna þeirra námu 38,8 milljarða kr. og tekjur um 1 milljarður kr. Jöfnuður þáttatekna án áhrifa innlánsstofnana í slitameðferð var jákvæður um 4,5 milljarða kr. og viðskiptajöfnuður jákvæður um 61,7 milljarða kr.

Erlendar eignir þjóðarbúsins námu 3.911 milljörðum kr. í lok ársfjórðungsins en skuldir 13.208 milljörðum kr. Hrein staða við útlönd var því neikvæð um 9.297 milljarða kr. og lækka nettóskuldir um tæpa 558 milljarða kr. á milli ársfjórðunga.

Að frátöldum innlánsstofnunum í slitameðferð námu eignir þjóðarbúsins 2.580 milljörðum kr. og skuldir 2.947 milljörðum kr. og var hrein staða neikvæð um 368 milljarða kr.

Greiðslujöfnuður á þriðja ársfjórðungi 2010.pdf