Áætla rekstrarafgang hjá Fljótdalshéraði á næsta ári

Samkvæmt fyrirliggjandi fjárhagsáætlun Fljótsdalshéraðs fyrir árið 2011 er gert ráð fyrir 19,5 milljóna kr. rekstarafgangi í samstæðureikningi A- og B hluta sveitarfélagsins. Þar af er gert ráð fyrir um 0,5 milljón kr. afgangi í A-hluta sem er hinn eiginlegi sveitarsjóður en það eru Aðalsjóður og Eignasjóður.

Þetta kemur fram í tilkynningu til Kauphallarinnar en fjárhagsáætlun fyrir árið 2011 var lögð fram til fyrri umræðu í bæjarstjórn Fljótsdalshéraðs í gær. Var henni vísað til seinni umræðu sem verður þann 15. des. n.k.

B-hluti samstæðureiknings eru þau fyrirtæki sem eru að meirihluta eða að fullu í eigu Fljótsdalshéraðs og þjónustutekjur standa alfarið undir rekstarútgjöldum. Þau eru Félagslegar íbúðir, HEF ehf, Brunavarnir á Héraði, Minjasafn Austurlands, Dvalarheimili aldraðra og Atvinnumálasjóður.

Veltufé frá rekstri í samstæðunni nemur um 345 milljónum kr. en þar af eru 224 milljónir áætlaðar hjá A hluta. Framlegð nemur um 611 milljónum kr. í samstæðu A og B hluta eða 22% af rekstartekjum. Þar af nemur framlegð í rekstri A hlutans um 445 milljónum kr. eða 18%.

Afborganir lána eru áætlaðar að nemi um 354 milljónum kr. á árinu 2011 í samstæðunni, þar af 296 milljónir hjá A hlutanum. Heildarskuldir og skuldbindingar eru áætlaðar um 6.9 milljarðar kr. í árslok 2011 hjá samstæðu A og B hluta eða 249% af áætluðum rekstartekjum. Þar af nema skuldir og skuldbindingar A hluta um 5.3 milljörðum kr. eða 213% af rekstartekjum.

Fljótsdalshérað hefur átt í samskiptum við eftirlitsnefnd um fjármál sveitarfélaga í ljósi þungrar fjárhagsstöðu sveitarfélagsins. Þessi samskipti hafa verið í formi reglulegrar upplýsingargjafar. Boðuð hefur verið lagasetning um fjármálareglur sveitarfélaga og þegar verið lögð fram tillaga að þeim reglum sem sveitarfélagið hefur þegar ákveðið að laga sig að.