Vilja opna Sparibanka

Til stendur að opna nýjan banka hér á landi en það er Ingólfur H. Ingólfsson sem fer fyrir hópi fimmtán fjárfesta sem koma að stofnun bankans. Samkvæmt frétt Ríkissjónvarpsins klukkan tíu í kvöld þá var hlutafélag stofnað um bankann í síðasta mánuði.

Ingólfur, sem er þekktur fyrir fjármálaráðgjöf, sagði í viðtali að bankinn yrði að mestu rekinn á netinu. Nú stæði til að auglýsa eftir bankastjóra og fara í hlutafjárútboð. Vonir standa til að það muni skila um einum milljarð.

Ingólfur segir einnig næstu skref að skipa stjórn bankans og svo þarf að leggja gögn fyrir Fjármálaeftirlitið og fá umsögn þaðan. Hann sagði svo að vonir stæðu til að bankinn opnaði eftir um eitt ár. Bankinn myndi þá heita Sparibankinn.