Betware skilaði 181 milljóna hagnaði í fyrra

Í tilkynningu segir að tekjur félagsins voru um 1.230 milljónir króna og jukust um meira en 50% frá fyrra ári. Starfsmenn Betware eru nú um 100 talsins, þar af um 60 hérlendis. Þeim fjölgaði um 18 árið 2009, aðallega hér á landi þar sem meginþróunarvinna fyrirtæksins á sér stað.

Betware er frumkvöðull í þróun og framleiðslu á hugbúnaði og netlausnum fyrir innlend og erlend ríkislottó og getraunir og á rætur í fyrirtækinu Margmiðlun, sem þróaði árið 1996 netlausn í samstarfi við Íslenskar getraunir. Sú lausn var sú fyrsta sem gerði það mögulegt að reka getraunir á Netinu og vakti mikla athygli forsvarsmanna fyrirtækja í slíkum rekstri víða um heim.

Betware hefur hingað til eingöngu starfað með ríkisreknum lottó- og getraunafyrirtækjum sem láta ágóða renna til samfélagslegra verkefna.

Helstu viðskiptavinir Betware eru Íslenskar getraunir, Íslensk getspá, Danske Spil (danska ríkislóttóið), British Columbia Lottery Corporation (lottó í Bresku Kólombíu í Kanada) og Sistemas Tecnicos de Loterias del Estado (spænska ríkislottóið).

Stefán Hrafnkelsson, framkvæmdastjóri og einn stofnenda Betware, segir að félagið afli 98% tekna sinna erlendis.

„Starfsemin er gjaldeyrisskapandi og við greiðum að sjálfsögðu skatta til íslenska ríkisins. Mjög góð afkoma Betware hefur því umtalsverða efnahagslega þýðingu fyrir íslenskt þjóðarbú og samfélagslegt gildi líka í ljósi þess að við rekum blómlegt fyrirtæki og sköpum örugg og góð störf hérlendis á erfiðleikatímum í efnahagslífinu. Við erum á réttri leið. Félagið er skuldlaust og hefur fjárhagslega getu til að takast á við spennandi tækifæri framundan og halda áfram öflugu þróunarstarfi. Þannig hefjum við bráðlega samstarf við öflug fyrirtæki á sínu sviði, sem skapar okkur enn betri stöðu á árinu 2010," segir Stefán í tilkynningunni.