Kortavelta: Mesta aukning frá hruni

Kreditkortavelta nam 26,9 milljörðum króna í ágúst og jókst um 1,4 milljarða frá fyrri mánuði. Í Morgunkorni Íslandsbanka segir að borið saman við ágúst í fyrra nemi aukningin 13,6 prósentum í krónum talið en að raungildi jókst kreditkortavelta um 10,9%.

„Þetta er mesta aukning sem orðið hefur í kreditkortaveltu að raungildi frá hruni og er mikill viðsnúningur frá því sem áður var," segir ennfremur og bent á til samanburðar að kreditkortaveltan dróst saman um um rétt tæp 30 prósent að raungildi á milli ára í ágúst í fyrra.

„Kreditkortavelta landsmanna virðist nú því vera að taka við sér á nýjan leik eftir að hafa tekið bakslag á öðrum ársfjórðungi. Eins og kunnugt er gefur kortavelta góða vísbendingu um þróun einkaneyslu og á öðrum ársfjórðungi dróst einkaneysla saman um 2,1% frá sama fjórðungi fyrra árs sem benti til þess að landsmenn sýndu enn mikið aðhald í heimilisbókhaldinu og að skýr viðsnúningur væri enn ekki kominn fram."

Þá er bent á að debetkortavelta í ágústmániði hafi numið rétt rúmum 34 milljörðum króna sem er líka aukning, upp á 2,4 prósent frá fyrri mánuði í krónum talið. „Ef litið er á raunbreytingu kredit- og debetkorta í innlendum búðum var 5,9% aukning í ágúst samanborið við 16% samdrátt á sama tíma fyrir ári. Þróun þessarar stærðar gefur því einnig vísbendingu um að einkaneysla sé nú að taka við sér á þriðja ársfjórðungi og hafi náð botni."