Svaraði athugasemdum vegna gagnavera

Fjármálaráðherra sendi í dag hagsmunasamtökum þeirra sem reka gagnaver svar í dag vegna óska þeirra um skattaívilnanir vegna reksturs gagnavera hér á landi. Fréttir hafa borist af því undanfarna daga að fyrirtæki sem hugðust reka gagnaver hér á landi væru farin að hugsa sinn gang. Ástæðan væri óhagstætt skattaumhverfi.

Steingrímur sagðist, í samtali við Reykjavík síðdegis, vilja að fyrirtækin fengu ákveðinn aðlögunartíma. Á þeim tíma fengu þau endurgreiddan virðisaukaskatt af búnaði sem þau flytja hingað inn vegna reksturs gagnaveranna. Steingrímur sagðist jafnframt vera reiðubúinn til að veita ívilnanir vegna skattlagningu þeirrar þjónustu sem gagnaver hér á landi myndu selja út úr landi. „Ég mun svara fyrirtækjunum í dag og tel að við séum að komast til móts við óskir þeirra," sagði Steingrímur. Hann segir þó að hafa verði þann fyrirvara á viðbrögðum íslenskra stjórnvalda að þau séu háð samþykki ESA, eftirlitsstofnun EFTA.

Steingrímur tók þó fram að það væri vandamál ef að iðnaður af þessu tagi getur ekki risið upp hér á landi án þess að fá miklar undanþágur frá almennum skattareglum. Það þýði að Íslendingar verði að sætta sig við að arðurinn af starfseminni komi ekki til skattlagningar hér, heldur í öðrum löndum.