SP gerir tímabundið hlé á innheimtuaðgerðum

Á vefsíðu SP segir að frá falli bankanna hefur SP-Fjármögnun verið leiðandi í að bjóða viðskiptavinum sínum margvísleg úrræði til þess að lækka greiðslubyrði af gerðum samningum í erlendu gjaldmiðlum, nú síðast með lækkun höfuðstóls, sem að meðaltali nemur 28% til einstaklinga. Í kjölfar dóms Hæstaréttar mun SP-Fjármögnun taka samninga um erlenda bílasamninga til endurskoðunar í fullu samræmi við niðurstöðu dómsins.

Í dómi Hæstaréttar er ekki kveðið á um með hvaða hætti samningarnir skulu endurreiknaðir þannig að niðurstöðu réttarins sé fullnægt og er því úrvinnsla samkvæmt breyttri réttarstöðu enn að mörgu leyti óljós. SP-Fjármögnun mun svo fljótt sem auðið er aðlaga viðkomandi samninga að gildandi rétti.

Nánari upplýsingar um viðbrögð SP-Fjármögnunar við dómi Hæstaréttar er að vænta á heimasíðu félagsins á næstu dögum.

Á vefsíðunni eru einnig eftirtaldar spurningar og svör:

Með hvaða hætti verða gengistryggðu lánin endurreiknuð?

Dómur Hæstaréttar kveður ekki með skýrum hætti á um hvernig eigi að endurreikna lánin. Um leið og niðurstaða liggur fyrir um hvernig eigi að endurreikna lánin munum við upplýsa okkar viðskiptavini á vef félagsins.

Hvernig verður innheimtum á gengistryggðum lánum háttað á næstunni?

Hlé verður gert tímabundið á innheimtuaðgerðum félagsins vegna gengistryggðra lána.

Hafa lántakendur gengstryggðra lána sem þegar hafa nýtt þau úrræði sem í boði hafa verið hjá félaginu fyrirgert rétti sínum til frekari leiðréttinga?

Nei, lántakendur sem þegar hafa nýtt úrræði fyrirtækisins hafa ekki fyrirgert rétti sínum til frekari leiðréttinga.