Engin skýring að svo stöddu

"Dráttur á sölu Sjóvár á sér eðlilegar skýringar sem Seðlabankinn getur ekki tjáð sig um opinberlega að svo stöddu," segir í yfirlýsingu Seðlabanka Íslands.

Bankinn segir upplýsingar í fréttum Stöðvar 2 á föstudag um sölu á Sjóvá ekki réttar. "Sagt er að inn í söluferli Eignasafns Seðlabanka Íslands ehf. og annarra eigenda Sjóvár hf. fléttist persónulegar deilur seðlabankastjóra og eins af forsvarsmönnum hugsanlegra kaupenda.

Seðlabankastjóri kannast ekki við þessar deilur og myndi auk þess aldrei láta ágreining um peningastefnu hafa áhrif á embættisfærslu sína. Fullyrðingar um slíkt fela í sér ærumeiðandi ummæli," segir í yfirlýsingunni. - gar