Kyrrsettu 111 milljónir í eigu Jóns Ásgeirs

Slitastjórn Glitnis banka fékk í dag úrskurð um alþjóðlega kyrrsetningu í sambandi við kröfur Glitnis á hendur Jóni Ásgeiri Jóhannessyni. Slitastjórn Glitnis segir að kyrrsetningin komi til vegna millifærslna sem framkvæmdar voru daginn eftir að eignir Jóns Ásgeirs voru kyrrsettar í Bretlandi þann 11. maí síðastliðinn.

Samkvæmt tilkynningu frá slitastjórninni voru færð í heild 585 þúsund bresk pund til Bohemian Partners LLP, Tina Maree Kilmister, Aspiring Capital Partners LLP og Jeffrey Ross Blue. Upphæðin samsvarar 111 milljónum íslenskra króna.

Kyrrsetningarnar gilda einungis um það fé sem þessir aðilar fengu frá Jóni Ásgeiri Jóhannessyni eftir að alþjóðleg kyrrsetning var gerð á eignum hans. Ekki var krafist kyrrsetningar á öðrum eignum viðkomandi aðila.