Gjaldþrotum fyrirtækja fækkaði milli ára í júní

Í júní 2010 voru 93 fyrirtæki tekin til gjaldþrotaskipta samanborið við 95 fyrirtæki í júní 2009, sem jafngildir rúmlega 2% fækkun milli ára.

Þetta kemur fram á vefsíðu Hagstofunnar. Þar segir að eftir atvinnugreinum voru flest gjaldþrot í byggingarstarfsemi og mannvirkjagerð.

Fyrstu 6 mánuði ársins 2010 er fjöldi gjaldþrota 548 sem er tæplega 8% aukning frá sama tímabili árið 2009 þegar 508 fyrirtæki voru tekin til gjaldþrotaskipta.

Í júní 2010 voru skráð 150 ný einkahlutafélög (ehf) samanborið við 237 einkahlutafélög í júní 2009, sem jafngildir tæplega 37% fækkun milli ára. Einnig voru skráð 32 samlagsfélög (slf) í júní. Heildarfjöldi nýskráðra einkahlutafélaga er því 899 fyrri hluta ársins og hefur nýskráningum fækkað um tæplega 32% frá sama tímabili árið 2009 þegar 1322 ný einkahlutafélög voru skráð.

Eftir atvinnugreinum voru flest einkahlutafélög skráð í heild- og smásöluverslun, viðgerðir á vélknúnum ökutækjum en flest samlagsfélög voru skráð í sérfræðileg, vísindaleg og tæknileg starfsemi.