Arion banki vill endurreisa Sigurplast

Til að taka af vafa starfsmanna, viðskiptamanna og annarra hagsmunaaðila Sigurplasts vill Arion banki koma því á framfæri að hann hann hyggst óska eftir því við skiptastjóra að áframhaldandi rekstur félagsins verði tryggður.

Þetta kemur fram í tilkynningu fá Arion banka sem send er í kjölfar yfirlýsinga forsvarsmanna Sigurplasts ehf., um að þeir hafi óskað eftir gjaldþrotaskiptum á félaginu. Arion banki vill koma eftirfarandi á framfæri:

„Að sögn forsvarsmanna Sigurplasts ehf. hafa þeir óskað eftir gjaldþrotaskiptum á félaginu. Arion banki er einn stærsti kröfuhafi Sigurplasts og er jafnframt eigandi þriðjungs hlutafjár félagsins. Forsvarsmönnum Sigurplasts hefur lengi verið ljóst að bankinn vill endurskipuleggja fjárhag félagsins, skjóta traustari stoðum undir rekstur þess og bjarga þar með þeim störfum sem í húfi eru.

Sigurplast hefur ekki verið úrskurðað gjaldþrota og skiptastjóri hefur ekki verið skipaður. Gert er ráð fyrir því að héraðsdómur taki beiðni forsvarsmanna félagsins fyrir á allra næstu dögum og skipi félaginu skiptastjóra.

Til að taka af vafa starfsmanna, viðskiptamanna og annarra hagsmunaaðila vill Arion banki koma því á framfæri að hann hann hyggst óska eftir því við skiptastjóra að áframhaldandi rekstur félagsins verði tryggður. Þannig hefur bankinn fullan hug á að taka þátt í endurreisn fyrirtækisins, tryggja störf þeirra starfsmanna sem að framleiðslunni koma og áframhaldandi viðskipti viðskiptavina félagsins.

Ef skiptastjóri fellst á aðkomu Arion banka um endurreisn félagsins, hyggst Arion banki selja félagið í opnu söluferli síðar. Bankinn mun kynna nýja tilhögun á rekstri Sigurplasts nánar ef samkomulag næst við skiptastjóra félagsins."