Leyfir yfirtöku Sparisjóðabankans á S. Helgasyni ehf.

Samkeppniseftirlitið telur ekki ástæðu til þess að aðhafast frekar vegna yfirtöku Sparisjóðabanka Íslands (SPB) á S. Helgasyni ehf.

Fjallað er um málið á vefsíðu eftirlitsins. Þar segir að Sparisjóðabankinn sé fjármálafyrirtæki sem starfar á grundvelli laga um fjármálafyrirtæki. Bankinn sérhæfði sig í heildsöluþjónustu við sparisjóði í landinu, auk þess að stunda lánaviðskipti við valda viðskiptavini. Fjármálaeftirlitið ákvað þann 21. mars 2009 að taka yfir vald hluthafafundar SPB. Þá ákvað Fjármálaeftirlitið 27. mars að skipa bankanum skilanefnd sem fer með öll málefni SPB og hefur umsjón með allri meðferð eigna hans og skulda.

S. Helgason starfar á innlendum steinsmiðjumarkaði skv. samrunaskrá og sérhæfir sig í rekstri á steinsmiðju til almennra steinsmiðjuverka. Samkvæmt samrunaskrá nær þjónusta S. Helgasonar þannig til smíða á flísum, borðplötum, legsteinum, vatnsbrettum og annarra hluta.

Í samkeppnislögum segir að telji Samkeppniseftirlitið að samruni hindri virka samkeppni með því að markaðsráðandi staða eins eða fleiri fyrirtækja verði til eða slík staða styrkist, eða verði að öðru leyti til þess að samkeppni raskist með umtalsverðum hætti geti stofnunin ógilt samruna eða sett honum skilyrði.

„Það er mat Samkeppniseftirlitsins að samruni þessa máls raski ekki samkeppni skv. þeim viðmiðunum sem felast í 17. gr. c samkeppnislaga. Við rannsókn málsins var m.a. tekið til athugunar hvort samkeppni kunni að verða raskað með eignarhaldi Sparisjóðabanka Íslands," segir í niðurstöðu Samkeppniseftirlitsins.

„Við það mat var m.a. horft til þess að SPB er ekki umsvifamikill í endurskipulagningu fyrirtækja auk þess sem hann sinnir ekki lengur almennri viðskiptabankaþjónustu né á eignarhluti í fyrirtækum sem starfa á sama markaði eða tengdum mörkuðum."