Hefur áhyggjur af því að fyrirhugaðar kosningar tefji Icesave

Gylfi Magnússon, efnahags- og viðskiptaráðherra, hefur áhyggjur af því að kosningarnar í Bretlandi og Hollandi tefji fyrir lausn Icesave deilunnar. Þetta sagði Gylfi í samtali við Reuters fréttastofuna í dag.

Hann sagði að Íslendingar væru reiðubúnir til að setjast niður nú þegar með fulltrúum Breta og Hollendinga til að ná samkomulagi. „Við myndum gjarnan vilja að þessar viðræður hæfust fyrr en síðar en við stjórnum ekki pólitíkinni í Bretlandi eða Hollandi," segir Gylfi. Hann benti jafnframt á að Icesave deilan væri þröskuldur fyrir lán Alþjóðagjaldeyrissjóðsins.

Moody's færði horfir á lánshæfismati úr stöðugum í neikvæðar fyrir skemmstu. Lánshæfismat Moody´s er ásamt lánshæfismati Standard & Poor's rétt fyrir ofan ruslflokk. Fitch hefur nú þegar fært lánshæfismatið í ruslflokk. Gylfi sagði við Reuters að mögulegir fjárfestar sem hann ræddi við í New York í vikunni hafi haft áhyggjur af þessu. Hann sagðist sjálfur ekki vera ánægður með þessa stöðu mála.