Fall Aska hefur engin áhrif á Saga Capital

Þorvaldur Lúðvík Sigurjónsson, forstjóri fjárfestingabankans Saga Capital, segir að fall fjárfestingabankans Aska Capital hafi engin áhrif á fyrirtækið sem hann rekur, Saga Capital. Hvorki á reksturinn né fjárhagslegan styrk bankans.

Á heimasíðu Aska kemur fram að Saga Capital hafi átt 18% í fyrirtækinu. Í dag óskaði stjórn Askar eftir að fara í slitameðferð. Dómur Hæstaréttar um ólögmæti gengistryggingar varð fyrirtækinu að falli.

Þorvaldur segir í samtali við Vísir.is að eignarhluturinn hafi verið færður verulega niður auk þess sem Saga Capital fjárfestingarbanki, eins og aðrir kröfuhafar, féllust á að breyta kröfum í hlutafé í Askar Capital á sl. ári.

Saga Capital eignaðist hlutinn í Öskum vegna þess það átti skuldabréf á félagið en í fjárhagslegri endurskipulagningu Aska var skuldabréfinu breytt í hlutafé.

Það var þó í raun ekki Saga Capital sem hélt á bréfunum í Öskum heldur félagið Hilda. Það er í eigu sömu aðila og Saga Capital og var stofnað í vetur til að taka meðal annars yfir hluta af skuldbindingum Saga Capital sem höfðu íþyngjandi áhrif á eiginfjárhlutfallið. Hilda á auk þess aðrar eignir s.s. ríkisskuldabréf,reiðufé, kröfur á gömlu bankana auk erlendra markaðseigna.