Vill rifta samkomulagi VBS og Landsbankans

Landsbankinn tók til sín nokkrar af verðmætustu eignum VBS fjárfestingarbanka, að fjárhæð 4,3 milljörðum króna, nokkrum mánuðum áður en VBS fór í þrot. Slitastjórnin vill rifta þessari greiðslu og verður tekin ákvörðun um málshöfðun á næstu vikum.

VBS var tekið til slitameðferðar í byrjun apríl á þessu ári. Rúmlega hálfu ári áður gerðu VBS og Landsbankinn samkomulag um uppgjör á skuldum VBS. Greiðslan, sem nam rúmlega 4,3 milljörðum króna, fór þannig fram að VBS setti verðmætin inn í nýtt einkahlutafélag sem fékk nafnið Vingþór og afsalaði svo félaginu til Landsbankans. Greiðslan fór fram í nóvember í fyrra. Landsbankinn greiddi fyrir hlutina í Vingþóri með skuldajöfnuði og eftirgjöf krafna sem námu tæpum 7 milljörðum króna.

Slitastjórn vill rifta þessari greiðslu og sendi bréf þess efnis til skilanefndar Landsbankans í lok ágúst. Samkvæmt gjaldþrotalögunum er skuldajöfnuður óheimill ef lánardrottinn veit að skuldarinn er ógjaldfær. Greiðsluerfiðleikar VBS höfðu margoft komið fram, m.a. í fjölmiðlum og árshlutauppgjöri bankans. Auk þess sem Landsbankinn og VBS höfðu lengi unnið að skuldauppgjöri en samkvæmt heimildum fréttastofu sýna gögn frá þeirri vinnu að VBS gæti ekki greitt skuldir sínar með venjulegum hætti.

Slitastjórnin telur að greiðslan hafi verið ótilhlýðilega til hagsbóta fyrir bankann á kostnað annarra kröfuhafa VBS auk þess sem greiðslumátinn var óvenjulegur. Samþykki skilanefnd Landsbankans ekki að rifta þessari greiðslu mun slitastjórn VBS höfða riftunarmál. Fari málið á þann veg má gera ráð fyrir að slitastjórnin fari einnig fram á skaðabætur.