Hagstofan: Húseigendur í vanda eru milli steins og sleggju

Fasteignamarkaður er enn í mikilli lægð eftir að hann hrundi í kjölfar falls bankanna. Uppsett verð í eigna lækkar treglega, en raunverð hefur lækkað mikið. Húseigendur sem eru í fjárhagsvanda eru milli steins og sleggju.

Þetta kemur fram í endurskoðaðri þjóðhagsspá Hagstofunnar. Þar segir að margir standa frammi fyrir því að geta ekki selt eignir sínar vegna yfirveðsetningar. Sala nú festir enda í sessi til frambúðar, það misgengi eigna og skulda sem átt hefur sér stað síðustu misseri. Seljendamegin á markaðnum neyðast því margir til halda sem fastast í íbúðir sem þeir þyrftu að selja í von um betri tíð í síðar.

Kaupendamegin er horft til offramboðs á húsnæði og hvort frekari verðhjöðnun gæti orðið auk óvissunnar í þjóðarbúskapnum. Því er lítið um viðskipti. Spáin gerir ráð fyrir að fasteignamarkaður taki hægfara við sér þegar hagvöxtur eykst. Gert er ráð fyrir að íbúðafjárfestingar vaxi verulega á næstu árum, en nauðsynlegt er að hafa í huga að vöxturinn er frá mjög lágu stigi.

Í gildi eru ákvæði um fulla endurgreiðslu virðisaukaskatts af vinnu manna á byggingarstað. Ennfremur setti Alþingi lög um skattaívilnun vegna greiðslu fyrir vinnu við viðhald og endurbætur á íbúðar- og frístundahúsnæði. Ívilnunin gerir árin 2010 og 2011 sérstaklega hagfelld til framkvæmda ef húseigendur eru jafnframt greiðendur tekjuskatts. Ívilnanirnar vinna gegn samdrætti í byggingargeiranum, en nettó áhrifin hreyfa þó þjóðhagsspána lítið.