Skilanefnd líklega þegar brotið skilyrði FME

Samkvæmt lögum geta þrotabú ekki verið hluthafar í bönkum. Fjármálaeftirlitið (FME) samþykkti ekki skilanefnd Glitnis sem eiganda íslandsbanka og því var sú leið farin hjá skilanefndinni að stofna sérstakt dótturfélag, ISB Holding, til að halda utan um 95 prósent hlut skilanefndarinnar í bankanum.

FME þurfti að samþykkja þessa tilhögun áður en hún gat orðið að veruleika og í dag gaf eftirlitið grænt ljós en setti þó ákveðin skilyrði fyrir henni. M.a að fjárhagslegur styrkur ISB Holding yrði tryggður til að geta stutt við bakið á Íslandsbanka ef rekstur bankans yrði erfiður.

FME segir að stjórn ISB Holding skuli vera að meirihluta skipuð stjórnarmönnum óháðum Glitni, stórum kröfuhöfum og Íslandsbanka sjálfum. Skilanefnd Glitnis er gefinn kostur á að tilnefna einn fulltrúa sinn í þriggja manna stjórn ISB Holding. Þess má geta að stjórn ISB Holding hefur þegar verið skipuð, en samkvæmt hlutafélagaskrá sitja í stjórninni þau María Björg Ágústsdóttir, starfsmaður skilanefndar Glitnis, Ólafur Ísleifsson, hagfræðingur, og Marta Eiríksdóttir, fyrrverandi stjórnarmaður í Íslandsbanka. Marta hefur þó látið af stjórnarsetunni og nýr maður tekið hennar sæti, en nafn hans hefur ekki fengist upp gefið.

Þá segir jafnframt í tilkynningu frá FME: "Kveða skilyrði Fjármálaeftirlitsins einnig á um það að af stjórnarmönnum bankans sjálfs skuli skilanefnd aðeins hafa einn fulltrúa, en aðrir skuli vera óháðir, þ.m.t. stjórnarformaður. Með því er átt við að þeir starfi hvorki í umboði einstakra eigenda eða kröfuhafa, né séu bundnir þeim eða bankanum sjálfum nokkrum hagsmunatengslum."

Sem kunnugt er hafa stjórnarmenn í Íslandsbanka þegar verið tilnefndir með óformlegri tilnefningu, en þeir eru Árni Tómasson formaður skilanefndar Glitnis og Jón Sigurðsson, fyrrverandi stjórnarformaður FME, auk fjögurra erlendra manna. Eins og fréttastofa greindi frá hinn 28. desember síðastliðinn hafði stjórn ISB Holding ekkert með tilnefningar stjórnarmannanna að gera, en þær höfðu verið ákveðnar áður, af skilanefnd Glitnis.

Það stangaðist á við upplýsingar frá skilanefndinni sjálfri, sem vildi ekkert upplýsa um tilnefningu Árna. Jafnframt voru þær upplýsingar veittar að Jón Sigurðsson hefði verið valinn því hann nyti trausts á alþjóðlegum vettvangi og meðal kröfuhafa Glitnis. Miðað við skilyrði FME hafa a.m.k tvö þeirra þegar verið brotin. Annars vegar þarf væntanlega að draga tilnefningu Jóns eða Árna til baka af þeirri ástæðu að skilanefndin getur aðeins átt einn fulltrúa í stjórn Íslandsbanka og auk þess getur Jón væntanlega ekki setið í stjórninni ef hann hefur verið valinn af kröfuhöfum bankans til stjórnarsetunnar, í samræmi við skilyrði Fjármálaeftirlitsins.

Árni Tómasson sagði í samtali við fréttastofu í dag að það væri ekki búið að senda inn formlegar tilnefningar í stjórn Íslandsbanka. Hann vildi ekki svara því hvort hann eða Jón Sigurðsson yrðu tilnefndir í stjórnina og vildi ekki tjá sig um málið að öðru leyti.