Uppsagnir verða minni en starfsfólkið óttast

Starfsmenn í verksmiðju Bakkavarar í bænum Bourne í Englandi hafa áhyggjur af væntanlegum niðurskurði og telja störf um þrjú hundruð manns í hættu.

David Roome, talsmaður verkalýðsfélagsins Unite, segir í samtali við dagblaðið Wisbech Standard að starfsfólk Bakkavarar sé reitt. Það vinni við erfiðar aðstæður og fái lítið greitt.

Bakkavör hefur unnið að hagræðingu síðastliðin þrjú, hefur meðal annars lokað ellefu óarðbærum verksmiðjum og sameinað framleiðslu í Bretlandi og Frakklandi. Samkvæmt upplýsingum frá Bakkavör verða uppsagnir mun minni en nemur þeim um þrjú hundruð störfum sem í húfi eru, líklega ekki nema brot af heildarfjöldanum.

Breytingar hafa gerðar hjá Bakkavör á fleiri stöðum en í Bretlandi. Fyrirtækið var tekið af hlutabréfamarkaði hér í apríl og er nú í einkaeigu. Kröfuhafar eignuðust þá í kringum þrjátíu prósenta hlut í félaginu en eignarhlutur Bakkavararbræðranna Ágústs og Lýðs Guðmundssona þurrkaðist út um nokkurra ára skeið.

Þá hafa höfuðstöðvar félagsins verið færðar úr Ármúlanum niður í Tjarnargötu. Þar var Bakkavör reyndar til húsa áður en eignarhaldið færðist undir Existu. - jab