Stýrivextir líklega aftur lækkaðir í lok júní

Í Morgunkorninu segir að af lestri fundargerðarinnar og þróun undanfarinna vikna má ráða að miklar líkur séu á að minnsta kosti jafn stóru vaxtalækkunarskrefi á næsta vaxtaákvörðunardegi Seðlabankans þann 23. júní næstkomandi og raunin hefur verið undanfarið.

Þannig voru nefndarmenn á einu máli um að ef gengi krónunnar héldist stöðugt eða styrktist, og verðbólga hjaðnaði í takti við spár, ættu forsendur fyrir því að draga smám saman úr peningalegu aðhaldi að vera áfram til staðar. Frá síðasta vaxtaákvörðunardegi hefur krónan styrkst um ríflega 3,6% gagnvart helstu viðskiptamyntum og frá áramótum nemur styrkingin rúmum 6%.

Áhrif þessa eru þegar tekin að koma fram í lækkun þeirrar innfluttu neysluvöru sem styst stoppar við í verslunum, s.s. matvöru. Þá eru tíðindi gærdagsins af samningi Seðlabankans og ríkissjóðs við Seðlabanka Lúxembúrgar jákvæð fyrir framgang efnahagsáætlunar AGS og stjórnvalda, þótt þau skipti ekki sköpum fyrir afléttingu gjaldeyrishafta eða vaxtalækkunartaktinn.