Eistneskur auðjöfur vildi yfirtaka Grindavík

Knattspyrnudeild Grindavíkur hafnaði síðasta sumar tilboði frá eistneskum auðjöfri um að yfirtaka knattspyrnudeildina og leggja tugi milljóna króna inn í rekstur hennar, segir Þorsteinn Gunnarsson, formaður knattspyrnudeildarinnar í samtali við Vísi.

Þorsteinn gerir málið að umtalsefni í nýlegum pistli sem birtist í riti knattspyrnudeildarinnar. „Hann minnti mig svolítið á Bjarna Ármannsson enda vatnsgreiddur og með allt á hreinu. Hann vatt sér beint að efninu og á þann hátt að hakan mín datt alla leið niður á gólf. Hann vildi leggja til tugi milljóna króna inn í rekstur knattspyrnudeildarinnar, taka með sér a.m.k. sjö til átta landsliðsmenn frá heimalandi sínu, hreinsa út þjálfarateymið og stærstan hlutann af leikmannahópnum, fara með liðið í þriggja mánaða æfingabúðir til Kýpur, gera liðið strax að Íslandsmeisturum og koma þannig liðinu inn í forkeppni Meistaradeildarinnar þar sem stóri peningapotturinn er og stórgræða peninga," segir Þorsteinn.

Þorsteinn segir að maðurinn, sem hann nafngreinir ekki, hafi sjálfur viljað taka yfir stjórn fótboltans og reka þetta einn og gleðja alla Grindvíkinga með því að gera liðið að því sterkasta og sigursælasta á landinu. Þorsteinn segist sjálfur hafa haldið að maðurinn væri að grínast. „En um mig hríslaðist veruleg ónotatilfinning þegar það rann upp fyrir mér að honum var fúlasta alvara. Ég sá að félagar mínir í stjórninni voru eitt spurningamerki í framan. Af hverju yfirtók hann bara ekki lið í Lettlandi? Hvaðan komu þessir fjármunir? Við reyndum kurteisislega að útskýra fyrir honum hvernig íslensk íþróttahreyfing er byggð upp og svona yfirtaka kæmi aldrei til greina og samrýmdist ekki íslenskum lögum og reglugerðum," segir Þorsteinn. Manninum hafi hins vegar veirð gerð grein fyrir því að honum væri velkomið að gerast risastór styrktaraðili knattspyrnudeildarinnar en án nokkurra skuldbindinga af hálfu félagsins.