Uppbygging í óvissu á Hljómalindarreit

Algjör óvissa ríkir um uppbyggingu á Hljómalindarreitnum svokallaða en fasteignafélagið Festar ehf., sem á flestar eignir þar, stendur afar illa. Fyrirtækið skuldaði tæpar 1.800 milljónir króna samkvæmt ársskýrslu 2008 og eigið fé fyrirtækisins var neikvætt um tæpar 700 milljónir króna. Langstærstur hluti skuldanna er við Landsbankann, eða um 1.250 milljónir króna. Stærstur hluti skuldanna er gengistryggður og því má gera ráð fyrir að staða fyrirtækisins sé mun verri nú en í lok árs 2008.

Festar ehf. eru í eigu Benedikts T. Sigurðssonar húsasmíðameistara sem fór mikinn í kaupum á húsnæði á og við Laugaveg árin fyrir efnahagshrun.

Hugmyndir voru uppi um að reisa hótel, verslunar-, veitinga- og þjónusturými á Hljómalindarreitnum. Hjá borgaryfirvöldum liggja fyrir teikningar að nýju skipulagi en nú er óvíst hvað verður.

Benedikt segist hafa verið að vinna í því að leysa vanda Festa ehf. með Landsbankanum. Ekki sé þó komin niðurstaða í málið. Hann segir að fyrirtækið hafi ekki getað staðið í skilum með lán. Spurður hvort hann óttist að missa fyrirtækið segir Benedikt: „Það getur alveg gerst. En það er eitthvað sem er ekki hægt að segja til um á þessari stundu. Við vitum ekki hvað þessi lægð varir lengi en við vitum að fasteignirnar fara ekkert. Þær eru þarna og bankinn er með tryggingu í þeim.“

Benedikt segir að í hans huga snúist málið um hvort bankinn hafi þolinmæði til að láta verðfall fasteigna líða yfir og að ráðist verði í framkvæmdir. „Það hafa ekki komið fram neinar aðrar hugmyndir frá bankanum. Það er vissulega ekki áhugavert að fara í svona verkefni í dag en þó vita allir sem hafa komið að því að það mun verða þörf á svona húsnæði í nánustu framtíð því það er það mikil niðurníðsla á miðborgarsvæðinu,“ segir Benedikt.

Samkvæmt heimildum Fréttablaðsins er verið að skoða mál Festa ehf. hjá Landsbanka Íslands og talið að þau muni skýrast innan tveggja mánaða. kristjan@frettabladid.is